Ek het baie lanklaas ‘n blog geskryf. En hierdie een wil ek gladnie skryf nie. Ek wil eerder vergeet, dit agter my sit. Whatever, dit het nooit gebeur nie, dit sal nie weer gebeur nie. Dis wat ek wil sê.
So drie weke terug is ek; ge-hijack op my fiets. Ek het 05:00 die oggend gaan fietsry soos ek maar maak vir al amper twintig jaar. En toe, toe spring daar drie ouens agter ‘n bos uit met ‘n mes, stamp my van my fiets af en steel alles wat ek by my gehad het. Maar die grootste ding wat hulle gesteel het, die een ding wat ek nie weer kan koop nie. Is my vrede. Hoe kry ek dit weer terug. Hoe kan ek weer agter my Herder aanloop na daardie groen weivelde van vrede en daardie waters van rus.
Hoe?
En toe kom Palm Sondag oor my pad. Ek het eintlik nie eers geweet dis Palm Sondag nie (ek is maar bietjie vaak as dit by die goed kom). As dit nie vir my vriend was wat laataand vir my ‘n boodskap gestuur het nie, het ek; dit gemis.
Palm Sondag. Jesus kom in Jerusalem in. Almal is oppad Paasfees toe. Hulle hoor wat Hy alles gedoen het. Hy het onlangs vir Lasarus uit die dood opgewek, blindes naby Jerigo laat sien. Hier kom Hy. Hulle gooi hulle klere op die pad voor Hom, swaai plamtakke, skreeu Hosana… Hy gaan ons uitsort. Easy, peasy, japaneysy… reg?
Nope! Dit werk nie so nie. Die pad van Palm Sondag na Paasfees is ‘n moeilike pad. ‘n Pad vol pyn. ‘n Pad van lyding. God is in daai pad. Dis God se pad. Die groot dinge in ons lewe. Die moeite werd dinge; kom swaar, kom deur lyding, kom deur elende, kom deur hijackings, siekte, dood, armoede, egskeidings…
Gin wonder Martin Luther het gesê :”My lyding is die beste boek in my Biblioteek.”
Ek soek God partymaal op die maklike plekke. In die optog met Paasfees. Ek wil omtrent altyd my swaarkry, my skaamkry wegsteek. Diep in ‘n kluis aan die onderkant van my hart. Ek is baie dom. Ek moet God soek in die kruis, in die graf, in die opstanding. Nuwe lewe kom net deur die kruis en die graf. Ek moet God soek in die hijacking. En ek het. En weet jy wat, toe kry ek Hom daar in die middel van dit alles. Vol liefde, met trane in sy oë. (Lukas 19:41)
Dis seker hoekom ons liefdevolle Vader vir Paulus gelei het om hierdie woorde te skryf:
Ons verheug ons ook in die swaarkry, want ons weet: swaarkry kweek volharding, 4en volharding kweek egtheid van geloof, en egtheid van geloof kweek hoop; 5en dié hoop beskaam nie, want God het sy liefde in ons harte uitgestort deur die Heilige Gees wat Hy aan ons gegee het.
Die Bybel Nuwe Vertaling. (1998). (electronic ed., Ro 5:3–5). Cape Town, South Africa: Bybelgenootskap van Suid-Afrika.
Dit vat guts. Die pad. Dit vat geduld. Patience kom van die wortel woord Patior en Patior beteken om te suffer, om te lei. So wat is die les wat ek hieruit vat.
Ek moet geduldig na God soek in hierdie terrible ding wat met my gebeur het. En ek moet bly soek na Hom. Tot ek Hom daar kry. Want dis in my swaarkry dat ek die naaste aan Jesus kom. Dis in my teleurstellings dat ek hom die helderste sien. Dis in my vrees dat ek Hom die meeste soek. Maar dis ‘n geduldige pad. Dis ‘n lankstap pad. Maar dis nie ‘n pad van ontkenning en palmtakke gooi en maklike antwoordjies nie. Dis die pad van die kruis, deur die graf, anderkant uit. Dis die moeite werd pad, dis Jesus se pad. Dis die pad wat vir my rus en vrede gaan bring. Dis die pad wat my weer by ‘n feesmaal gaan laat aansit! Dis die pad wat gaan maak dat ek weer tuis gaan wees in die huis van die Here tot in lengte van dae.